২৯ অক্টোবৰ, পুৱা ৩ বজা:
----------------------------
হাতত কাগজ এখন লৈ আৰক্ষী বিষয়াজন মোৰ ৰুমলৈ হুৰমুৰকৈ সোমাই আহিল ৷
"কি কেছ?"
"এক্সিডেণ্ট কেছ ছাৰ ৷ মাৰা গৈছে ৷"
"কিমান বয়স?"
"বিশ একৈশ বছৰমান হ'ব ৷ বাইক এক্সিডেণ্ট ৷ ইমান ধুনীয়া ল'ৰা, দেখি বেয়াই লাগি গৈছে ৷ কিন্তু কি কৰিব ছাৰ, ইমান ৰাতিখন বহুত বেছি মদ খাই বাইক চলাইছিল ৷ ওচৰলৈ গ'লেই মদৰ গোন্ধ পায় ৷ হেলমেটো পিন্ধা নাছিল ৷ পেট্ৰলিং ডিউটিত আছিলোঁ সেইসময়ত, মোৰ চকুৰ সন্মূখতে হোৱা ঘটনা ৷ ফুল স্পীডত থকা বাইকখনে ডিভাইডাৰত খুন্দা মাৰি ৰাস্তাৰ ইটো কাষলৈ উফৰি পৰিছিল ৷ ভাগ্যে সেই সময়ত ৰাস্তাত কোনো নাছিল বুলিহে, নহ'লে নিজৰ লগতে বেলেগ কাৰোবাকো মহতিয়াই নিলেহেঁতেন ৷ আই কাৰ্ডখন পাইছোঁ তাৰ পকেটত ৷ বি,এ, ফাৰ্ষ্ট ইয়েৰৰ ষ্টুডেণ্ট ৷"
তেখেতক একো নক'লোঁ ৷ কাগজখনত চহী কৰাৰ লগতে বিভাগীয় কামখিনি সম্পন্ন কৰি প'ষ্ট মৰ্টেম কৰা ঠাইত ল'ৰাটোৰ 'বডীটো' ৰখাৰ ব্যৱস্থা কৰিলোঁ ৷ এনে উচ্ছৃংখলতা দেখি বেয়া লাগে ৷ দূৰ্ঘটনাগ্ৰস্ত হ'লে দুখ লাগে ৷ মদ্যপান কৰি বাইক বা গাড়ী চলাই পথচাৰীক মহতিয়াই নিজৰ লগতে বেলেগৰ জীৱন সংকটাপূৰ্ণ কৰি তুলিলে দুখ লগাৰ লগতে খঙ উঠে ৷ হেৰৌ, নিজে মৰিব খুজিছ মৰ ! বেলেগক কিয় মাৰ? দোষ কাৰ? ইমান সৰু ল'ৰাটোৱে কাৰ পইছাৰে মদ খাইছিল? কাৰ বাইক চলাইছিল? ৰাতিখন ল'ৰাটোৱে ক'ত কি কৰি আছিল, সেয়া মাক দেউতাকে খবৰ ৰাখিছিলনে? অভিভাৱক তথা নৱপ্ৰজন্ম সচেতন হ'বৰ সময় হোৱা নাইনে? হ'বগৈনে কেতিয়াবা?
#বাস্তৱ ৷
#শ্লীলতা_অশ্লীলতা_প্ৰিয়_আৰু_অপ্ৰিয়_সত্য ৷
#ডাঃ_কুমাৰ_পাৰ্থ_প্ৰতিম ৷
No comments:
Post a Comment